1Ki 15 | NdeIBE | STEP | Ngomnyaka wetshumi lafica mibili wokubusa kukaJerobhowami indodana kaNebhathi, u-Abhija waba yinkosi yakoJuda,

1 Kings 15

U-Abhija iNkosi yakoJuda

1 Ngomnyaka wetshumi lafica mibili wokubusa kukaJerobhowami indodana kaNebhathi, u-Abhija waba yinkosi yakoJuda,

2 njalo wabusa eJerusalema okweminyaka emithathu. Ibizo likanina lalinguMahakha indodakazi ka-Abhshalomi. 3 Wenza zonke izono ezazisenziwa nguyise, inhliziyo yakhe yayingekho ekukhonzeni uJehova uNkulunkulu wakhe, inganjengenhliziyo kaDavida ukhokho wakhe. 4 Kungenani, ngenxa kaDavida uJehova uNkulunkulu wamnika isibane eJerusalema ngokuveza indodana eyayizathatha isihlalo sakhe langokuqinisa iJerusalema. 5 UDavida wayekwenzile konke okufaneleyo emehlweni kaJehova njalo kehlulekanga ukugcina imilayo kaJehova kuzo zonke izinsuku zokuphila kwakhe – ngaphandle kwendaba ka-Uriya umHithi.

6 Kwaba lempi phakathi kukaRehobhowami loJerobhowami ngaso sonke isikhathi sokuphila kuka-Abhija. 7 Okunye okumayelana lombuso ka-Abhija, lakho konke akwenzayo, akulotshwanga yini egwalweni lwembali yamakhosi akoJuda? Kwaba lempi phakathi kuka-Abhija loJerobhowami. 8 U-Abhija waphumula laboyise wangcwatshwa emzini kaDavida. U-Asa indodana yakhe wathatha ubukhosi bukayise.

U-Asa iNkosi yakoJuda

9 Ngomnyaka wamatshumi amabili okubusa kukaJerobhowami inkosi yako-Israyeli, u-Asa waba yinkosi yakoJuda, 10 wabusa eJerusalema okweminyaka engamatshumi amane lowodwa. Ibizo likagogo wakhe lalinguMahakha indodakazi ka-Abhshalomi.

11 U-Asa wenza okubukekayo phambi kukaJehova, njengalokhu okwakwenziwe nguDavida uyise. 12 Waxotsha abesilisa ababewula ngokwenzana abafazi wadiliza zonke izithombe ezazakhiwe ngoyise. 13 Waze waxotsha kanye logogo wakhe uMahakha wamsusa esihlalweni sokuba yindlovukazi yomndlunkulu, ngoba wayebumbe isithombe esilihlazo sika-Ashera. U-Asa wasidilizela phansi lesisithombe wayasitshisela eSigodini saseKhidroni. 14 Noma engadilizanga izindawo eziphakemeyo, inhliziyo ka-Asa yayinamathele kuJehova impilo yakhe yonke. 15 Waletha ethempelini likaJehova isiliva legolide lonke uyise kanye laye ababekunikele lezinye impahla.

16 Kwaba lempi phakathi kuka-Asa loBhahasha inkosi yako-Israyeli ekubuseni kwabo bonke. 17 UBhahasha inkosi yako-Israyeli waqophana loJuda wasehonqolozela umuzi weRama ukuvimbela loba ngubani owayezama ukuphuma loba ukungena elizweni lika-Asa inkosi yakoJuda.

18 U-Asa wasethatha isiliva sonke legolide elalisele eziphaleni zokuligugu ethempelini likaJehova lokwakusesigodlweni sakhe. Wakubeka ezandleni zezikhulu zakhe wazithumela kuBheni-Hadadi indodana kaThabhrimoni, oyindodana kaHeziyoni, inkosi yase-Aramu, owayebusa eDamaseko. 19 “Akube khona ubudlelwano phakathi kwami lawe,” watsho, eqhubeka wathi, “njengoba kwakunjalo phakathi kukayihlo lobaba. Khangela ngikuthumela izipho zesiliva legolide. Wena quma ubudlelwano bakho loBhahasha inkosi yako-Israyeli yikho ezaphuma elizweni lami.”

20 UBheni-Hadadi wavumelana lenkosi u-Asa wasethumela abalawuli bamabutho akhe ukuyahlasela amadolobho ako-Israyeli. Wanqoba ele-Ijoni, eleDani, ele-Abheli Bhethi Mahakha lalo lonke elaseKhinerethi kanye lelaseNafthali. 21 UBhahasha wathi ekuzwa lokho, wema ukwakha iRama wasehlehlela eThiriza. 22 INkosi u-Asa yaquma ukuthi kulo lonke elakoJuda – kungasali muntu. Basebethutha eRama bethwala amatshe lamapulanka ayekade esetshenziswa nguBhahasha kuleyondawo. Ngalokho inkosi u-Asa yakha iGeba kwelakoBhenjamini, leMizipha.

23 Konke okumayelana lombuso ka-Asa, lalokho anqoba kikho, lamadolobho wonke ayewakhile, akulotshwanga na egwaleni lwembali yamakhosi akoJuda? Kodwa-ke, ekuluphaleni kwakhe, waba lomkhuhlane ezinyaweni zakhe. 24 Ngakho u-Asa waya ekuphumuleni wangcwatshwa laboyise emzini kayise uDavida. Kwathi indodana yakhe uJehoshafathi wathatha isihlalo sakhe sobukhosi.

UNadabi iNkosi yako-Israyeli

25 UNadabi indodana kaJerobhowami waba yinkosi yabako-Israyeli ngomnyaka wesibili ka-Asa inkosi yakoJuda, njalo wabusa abako-Israyeli okweminyaka emibili. 26 Wona wenza okubi emehlweni kaJehova, wahamba ngendlela kayise lasezonweni zakhe, lezo ezazibangele ukuthi u-Israyeli angene kuzo adale isono.

27 UBhahasha indodana ka-Ahija owendlu ka-Isakhari waceba ukumbulala. Wambulala eGibhethoni elinye lamadolobho amaFilisti, ngesikhathi uNadabi labo bonke abako-Israyeli belihanqile. 28 UBhahasha wabulala uNadabi ngomnyaka wesithathu wombuso ka-Asa inkosi yakoJuda wasehlala esihlalweni sakhe sobukhosi.

29 Waqalisa ukubusa wahle wabulala bonke abendlu kaJerobhowami. Kazange atshiyele uJerobhowami loyedwa kodwa wabhubhisa bonke elandela ilizwi likaJehova eleza lenceku yakhe u-Ahija umShilo – 30 ngenxa yezono zikaJerobhowami ayezenzile njalo enguye owabangela ukuthi u-Israyeli one, ngoba wathukuthelisa uJehova, uNkulunkulu ka-Israyeli.

31 Ezinye izehlakalo ekubuseni kukaNadabi, lakho konke akwenzayo, akulotshwanga na egwaleni lwembali yamakhosi ako-Israyeli?

32 Kwaba lempi phakathi kuka-Asa loBhahasha inkosi yako-Israyeli ngesikhathi sonke sokubusa kwabo.

UBhahasha iNkosi yako-Israyeli

33 Ngomnyaka wesithathu ka-Asa inkosi yakoJuda, uBhahasha indodana ka-Ahija waba yinkosi yalo lonke elako-Israyeli laseThiriza, njalo wabusa iminyaka engamatshumi amabili lane. 34 Wona phambi kukaJehova, wahamba ngendlela kaJerobhowami lezono zakhe, lezo abangela u-Israyeli ukuthi azenze.